6/recent/ticker-posts

Shirika la Louis Nielsen la Denmark laendesha kambi ya siku tano ya uchunguzi wa afya ya macho



WIZARA ya Afya Zanzibar kupitia Kitengo cha Uratibu wa Huduma za Afya ya Macho, kwa kushirikiana na Shirika la Louis Nielsen la nchini Denmark, imeendesha kambi ya siku tano ya uchunguzi wa afya ya macho, upimaji wa uwezo wa kuona na utoaji wa miwani bure kwa wananchi katika Hospitali ya Wilaya ya Kivunge, ikiwa ni sehemu ya juhudi za kuimarisha huduma za afya ya macho na kupunguza changamoto za uoni miongoni mwa wananchi.
Akizungumza katika kambi hiyo, Mratibu wa Huduma za Afya ya Macho Zanzibar, Dkt. Fatma Juma Omar, amesema jumla ya wananchi 1,200 wamejitokeza na kupata huduma za uchunguzi na vipimo vya macho, ambapo waliobainika kuwa na changamoto za uoni wamepatiwa miwani kulingana na mahitaji yao.
Amesema matatizo ya macho ni miongoni mwa changamoto za kiafya zinazoikabili jamii duniani kote, ikiwemo Zanzibar, hivyo Serikali inaendelea kushirikiana na wadau wa maendeleo kuimarisha huduma hizo kwa kuzisogeza karibu na wananchi, pamoja na kuhakikisha wanapata uchunguzi na matibabu kwa wakati bila vikwazo vya gharama.
Ameeleza kuwa katika kambi hiyo wananchi wamepatiwa miwani ya aina mbalimbali, ikiwemo miwani ya kusomea ambayo hutumika zaidi na watu wenye umri wa miaka 40 na kuendelea, pamoja na miwani ya kusaidia watu wenye changamoto ya kuona vizuri vitu vilivyo mbali.
Dkt. Fatma amewahimiza wananchi kuwa na utaratibu wa kufanya uchunguzi wa afya ya macho mara kwa mara badala ya kusubiri hadi wanapopata matatizo makubwa ya uoni, huku akiwataka kufuata ushauri wa wataalamu ili kujikinga na madhara yanayoweza kusababisha upotevu wa uwezo wa kuona.
Kwa upande wake, Mwakilishi wa Shirika la Louis Nielsen, ambaye ni Mkuu wa Idara za Bidhaa wa Louis Nielsen Specsavers nchini Denmark, Anas, amesema shirika hilo limeona umuhimu wa kushirikiana na Serikali ya Zanzibar katika kuimarisha huduma za afya ya macho kutokana na uhitaji mkubwa wa huduma hizo katika jamii.
Amesema lengo la ushirikiano huo ni kuwasaidia wananchi kutambua mapema changamoto za afya ya macho, kupata huduma stahiki na kuimarisha uwezo wao wa kuona, akieleza kuwa wataendelea kuunga mkono juhudi zinazolenga kuboresha afya na ustawi wa wananchi

 

Post a Comment

0 Comments