WIZARA ya Afya Zanzibar imepokea ujumbe wa madaktari bingwa kutoka Chuo Kikuu cha Hokland nchini Norway kwa ajili ya kutoa huduma za matibabu kwa wagonjwa wenye maradhi ya kinamama, hususan wale wenye changamoto za kiafya ambazo zimekuwa ngumu kutibiwa na wataalamu wa afya waliopo nchini.
Akizungumza kuhusu ujio wa madaktari hao, Waziri wa Afya Zanzibar, Nassor Ahmed Mazrui, amesema ushirikiano huo ni sehemu ya juhudi za Serikali za kuimarisha huduma za matibabu ya kibingwa na kibobezi katika hospitali mbalimbali nchini, ili kuhakikisha wananchi wanapata huduma stahiki kwa wakati.
Amesema madaktari hao wamefanya matibabu katika hospitali mbalimbali za wilaya zikiwemo Mwera, Pongwe, Ijitimai, Chumbuni na Pangatupu, kwa lengo la kuwafikia wagonjwa wenye mahitaji maalumu ya matibabu na kupunguza changamoto za upatikanaji wa huduma za kibingwa.
Ameeleza kuwa katika ziara hiyo, madaktari hao wamefanikiwa kuwahudumia wagonjwa waliokuwa na kesi ngumu za kiafya, zikiwemo zile zilizokuwa zimeshindikana kufanyiwa upasuaji na wataalamu wa hapa nchini kutokana na kuhitaji utaalamu na uzoefu wa ziada.
Aidha, amesema ujio wa madaktari hao una umuhimu mkubwa katika kuimarisha mfumo wa huduma za afya Zanzibar, kwani unawawezesha wagonjwa kupata matibabu ya kibingwa ndani ya nchi na hivyo kupunguza uhitaji wa kutafuta huduma hizo nje ya Zanzibar.
Waziri Mazrui amefahamisha kuwa Chuo Kikuu cha Hokland ni mshirika wa muda mrefu wa Wizara ya Afya Zanzibar kwa takribani miaka 10, ambapo madaktari hao wamekuwa wakifanya ziara nchini mara mbili kwa mwaka kwa ajili ya kutoa matibabu kwa wagonjwa wenye changamoto ngumu za kiafya.
Amesema mbali na kutoa huduma za matibabu, ushirikiano huo pia umekuwa ukitoa fursa kwa madaktari wa Zanzibar kujifunza na kupata uzoefu kutoka kwa wataalamu hao wa kimataifa, jambo linalochangia kuongeza ujuzi, uwezo na kuimarisha utendaji wa wataalamu wa afya katika maeneo yao ya kazi.
Amewashukuru madaktari na uongozi wa Chuo Kikuu cha Hokland kwa kuendelea kushirikiana na Serikali ya Mapinduzi ya Zanzibar katika kuimarisha sekta ya afya, akieleza kuwa mchango wao una manufaa makubwa kwa wagonjwa pamoja na wataalamu wa afya nchini


0 Comments