6/recent/ticker-posts

KATIBU MKUU WIZARA YA MAJI NISHATI NA MADINI AFANYA ZIARA KUANGALAia MAKONTENA YENYE BETRI ZA KUHIFADHI UMEME WA JUA MATEMWE KASKAZINI UNGUJA

Meneja Uwendeshaji ZECO Mohamed Zubeir Kombo akizungumza na Waandishi wa Habari mara baada ya kumalizika kwa Ziara ya Katibu Mkuu Wizara ya Maji Nishati na Madini kuangalia Kontena zenye Uwezo wa Kuhifadhi Umeme wa Jua MW 20 katika juhudi za Serikali kupunguza tatizo la kukatika Umeme  ambazo zitawekwa katika Kituo Cha Umeme  Matemwe Wilaya ya Kaskazini A Zanzibar.

Katibu Mkuu Wizara ya Maji Nishati na Madini Josef Kilangi akizungumza na Waandishi wa Habari kuhusiana na Kontena    zenye Uwezo wa Kuhifadhi Umeme wa Jua MW 20 katika juhudi za Serikali kupunguza tatizo la kukatika Umeme baada ya ziara Maalum kuangalia Kontena hizo  ambazo zitawekwa katika Kituo Cha Umeme  Matemwe Wilaya ya Kaskazini A Zanzibar.

Msimamizi wa Mradi wa Umeme wa Jua Abdulwahabi mohamed Suleiman akizumngumza na Waandishi wa Habari mara baada ya kumalizika kwa Ziara ya Katibu Mkuu Wizara ya Maji Nishati na Madini kuangalia Kontena zenye  Uwezo wa Kuhifadhi Umeme wa Jua MW 20 katika juhudi za Serikali kupunguza tatizo la kukatika Umeme ambazo zitawekwa katika Kituo Cha Umeme  Matemwe Wilaya ya Kaskazini A Zanzibar.


Na Maelezo Zanzibar 15.11.2026

Serikali ya Mapinduzi ya Zanzibar inaendelea kuimarisha miundombinu ya uzalishaji na uhifadhi wa umeme wa jua, hatua inayolenga kupunguza tatizo la kukatika kwa umeme na kuhakikisha wananchi wanapata huduma ya umeme wa uhakika.

Akizungumza na waandishi wa habari mara baada ya ziara ya kukagua mitambo ya kuhifadhi umeme wa jua iliyopo Matemwe, Mkoa wa Kaskazini Unguja, Katibu Mkuu wa Wizara ya Maji, Nishati na Madini Zanzibar, Joseph J. Kilangi, amesema mitambo hiyo itakuwa na uwezo wa kuhifadhi umeme kwa ajili ya matumizi kwa wananchi.

Amesema Serikali imeendelea kuongeza juhudi za kuimarisha sekta ya nishati kwa kuweka miundombinu itakayohakikisha wananchi wanapata huduma ya umeme wa uhakika na kupunguza changamoto za kukatika kwa huduma hiyo.
Amebainisha kuwa mradi huo umegharimu shilingi milioni 159 pamoja na ufungaji wa solar panels zitakazozalisha megawati 30, huku betri zitakazofungwa zikiwa na uwezo wa kuhifadhi megawati 20 za umeme, ambazo zinaweza kutumika kwa muda wa takribani saa mbili.

"Megawati 20 zinaweza kutumika kwa saa mbili au chini ya hapo au kutegemea na kiwango cha umeme kinachohitajikaa aidha tutatoa megawati 10 kwa wakati wa usiku ili wananchi waweze kupata huduma hiyo" amefahamisha Katibu huyo.

Amesema ongezeko la uwekezaji nchini ni miongoni mwa chachu za maendeleo na kukuza uchumi, limechangia kuongezeka kwa mahitaji ya umeme hali iliyopelekea Serikali kuchukua hatua za kuimarisha uzalishaji na usambazaji wa nishati hiyo.

Ameeleza kuwa katika eneo la Bambi, umeme wa jua unatarajiwa kuzalishwa kwa kiwango cha megawati 30, ambapo hatua za kuanza kufunga mitambo yenye uwezo wa kuzalisha megawati 7.8 zinatarajiwa kukamilika ndani ya wiki moja.

Aidha, amesema kupitia Shirika la Umeme Zanzibar (ZECO), ujenzi wa laini za kusafirisha umeme huo tayari umeanza ili kurahisisha upokeaji na usambazaji wake katika gridi ya taifa.

Ameongeza kuwa ifikapo Desemba 2026 Serikali inatarajia kuzalisha jumla ya megawati 30 hadi 40 za umeme wa jua.

Vilevile amewaomba wananchi kuwa wavumilivu wakati Serikali ikiendelea na juhudi za kutatua changamoto za umeme na kuwataka kushirikiana katika kulinda miundombinu hiyo ili iweze kudumu na kutoa huduma iliyokusudiwa.

Kwa upande wake, Meneja Operesheni wa Shirika la Umeme Zanzibar (ZECO), Mohamed Zubeir Kombo, amesema shirika hilo linaendelea kwa kasi utekelezaji wa mradi huo pamoja na ujenzi wa miundombinu ya kusafirisha umeme ili kuhakikisha wananchi wanapata huduma kwa wakati.

Amesema ZECO inaendelea kuweka laini za umeme zitakazowezesha vyanzo vipya vya uzalishaji vinapoanza kufanya kazi ili umeme uweze kufikishwa kwa wananchi bila changamoto.

Aidha, ameeleza kuwa Shirika hilo linaendelea na ujenzi wa kituo kikubwa cha kupoza umeme, ambacho pia kitapokea umeme unaozalishwa na mitambo ya jua kwa ajili ya kusambazwa kwa watumiaji.

Naye Msimamizi wa mradi huo, Abdulwahab Mohamed Suleiman, amesema ujenzi wa kituo hicho tayari umeanza na kuahidi kuwa utakamilishwa kwa wakati ili kuwawezesha wananchi kunufaika na huduma hiyo.

Jumla ya makontena sita yenye betri za kuhifadhia umeme wa jua tayari yamewasili katika eneo la Matemwe kwa ajili ya kufungwa na kutumika katika kuhifadhi umeme huo.

 

Post a Comment

0 Comments