Makamu wa Rais wa Jamhuri ya Muungano wa Tanzania, Mhe. Deogratius Ndejembi akisalimiana na wananchi wa Mtama mara baada ya kukagua ujenzi wa Stendi ya Mabasi ya Halmashauri ya Mtama, akiwa ziarani mkoani Lindi, leo tarehe 14 Novemba 2026.
Makamu wa Rais wa Jamhuri ya Muungano wa Tanzania Mhe. Deogratius ametembelea na kukagua ujenzi wa kituo cha mabasi katika Halmashauri ya Wilaya ya Mtama, mkoani Lindi, akitaka uwekezaji huo uwe chachu ya biashara, ajira na ongezeko la mapato litakaloboresha huduma kwa wananchi.
Akizungumza na wananchi katika eneo la mradi, Makamu wa Rais amesisitiza umuhimu wa kuutazama mradi huo kwa upana, kwa kuzingatia mahitaji ya usafiri yaliyopo na fursa zinazotokana na kukua kwa shughuli za kiuchumi katika ukanda wa kusini.
Amesema pamoja na kuhudumia mabasi na abiria, eneo hilo linaweza kuendelezwa kwa kuzingatia huduma zinazohitajika na madereva wa malori na wasafiri wengine, hatua itakayopanua wigo wa biashara kwa wananchi wa Mtama.
Ameeleza kuwa maegesho yanapoambatana na huduma za chakula, mapumziko na mahitaji mengine ya wasafiri, manufaa yake huwafikia pia wafanyabiashara wadogo, watoa huduma za bodaboda na wananchi wanaozunguka eneo la mradi.
Kwa mujibu wa taarifa iliyowasilishwa wakati wa ukaguzi, usanifu wa kituo hicho unajumuisha nafasi za kuegesha mabasi makubwa 24 na mabasi madogo 32 kwa wakati mmoja, pamoja na maeneo ya vyombo vingine vya usafiri. Makadirio ya awali yaliyotajwa ni kukusanya mapato ya shilingi milioni 330 kwa mwaka.
Makamu wa Rais amekumbusha kuwa Serikali ya Rais Dkt. Samia Suluhu Hassan imeunga mkono utekelezaji wa mradi huo, baada ya ombi la kuongeza fedha ili kuharakisha ujenzi wake.
Katika mkutano huo, Mbunge wa Mtama, Nape Nnauye, ameishukuru Serikali kwa kuendeleza mradi huo na kuwasilisha maombi ya wananchi kuhusu miundombinu ya barabara, ujenzi wa soko la kisasa, elimu ya ufundi na huduma nyingine za maendeleo.
Miongoni mwa maombi hayo ni kujengwa kwa mzunguko wa barabara katika makutano muhimu ya Mtama, ili kuboresha mpangilio wa magari na kuendana na ukuaji wa eneo hilo.
Makamu wa Rais ameelekeza mzunguko huo ujengwe wakati kazi za barabara zikiendelea, huku upande wa Serikali unaosimamia ujenzi ukithibitisha kuwa maelekezo hayo yatatekelezwa.
Ziara hiyo pia imeweka msisitizo katika kuwaandaa vijana wa kusini kunufaika na fursa za kiuchumi zinazotarajiwa kutokana na mradi wa gesi asilia iliyochakatwa, LNG, mkoani Lindi.
Makamu wa Rais ameielekeza Wizara ya Nishati kushirikiana na Mamlaka ya Udhibiti wa Mkondo wa Juu wa Petroli (PURA) pamoja na Wizara ya Elimu kuandaa mpango wa mafunzo yatakayowajengea vijana wa Lindi na Mtwara ujuzi unaohitajika katika sekta ya gesi.
Amesisitiza kuwa mafunzo yanayotolewa katika maeneo hayo yanapaswa kuendana na shughuli na fursa za uchumi zinazoyazunguka, ili vijana wawe na uwezo wa kushiriki katika miradi inayokuja.
Kuhusu elimu ya ufundi Mtama, amemtaka Mbunge kushirikiana na Waziri wa Elimu kufuatilia hatua za kuanzisha chuo cha ufundi cha VETA, ili wananchi wapate nafasi zaidi za kujifunza stadi za kazi.
Katika hatua nyingine, Makamu wa Rais ametoa maelekezo ya kushughulikiwa kwa migogoro ya wakulima na wafugaji, akisisitiza kuwa wananchi wanapaswa kufanya shughuli zao kwa amani na bila kuhofia usalama wao.
Amewataka viongozi wa Mkoa wa Lindi kuchukua hatua dhidi ya wanaokiuka taratibu za matumizi ya ardhi, wanaoingiza mifugo bila kufuata utaratibu na wanaochochea migogoro, wakiwemo viongozi wanaotumia nafasi zao vibaya.
Amesema wananchi wanaohamia katika maeneo mbalimbali kwa ajili ya kilimo au ufugaji wanapaswa kufuata sheria na taratibu, huku akisisitiza umoja na mshikamano wa Watanzania.
Ukaguzi wa kituo hicho umeweka mbele matarajio ya Mtama inayokua kupitia usafiri, biashara na huduma; pamoja na wajibu wa kuhakikisha uwekezaji unaofanywa unageuka kuwa fursa za kipato na maisha bora kwa wananchi.
Awali, kabla ya kutembelea na kukagua ujenzi wa kituo hicho cha mabasi, Makamu wa Rais alipokelewa katika Kijiji cha Madangwa na kuzungumza na wananchi.
Katika ziara hiyo, Serikali iliombwa kuhakikisha wakandarasi wanamwagilia maji maeneo ya makazi yanayopitiwa na ujenzi wa barabara ili kupunguza vumbi na kulinda afya za wananchi. Pia, ilielezwa kuwa fidia kwa wananchi wanaostahili italipwa kwa awamu, Wizara ya Ujenzi ikielekezwa kufuatilia na kuhakikisha Fedha za fidia zinalipwa kwa wakati.
Katika kuimarisha kilimo cha korosho, Makamu wa Rais amesisitiza dhamira ya Serikali kuendelea kutoa ruzuku ya pembejeo na kuhakikisha zinawafikia wakulima kwa wakati.
Kwa upande wake, Waziri wa Kilimo Mhe. Daniel Chongolo ameahidi kufika kuanza ugawaji wa mbolea ya salfa ya unga tarehe 1 Machi, 2027 ili kuwawezesha wakulima kujiandaa mapema kwa msimu wa uzalishaji korosho na kuongeza tija.
Makamu wa Rais wa Jamhuri ya Muungano wa Tanzania, Mhe. Deogratius Ndejembi akisalimiana na wananchi wa Mtama mara baada ya kukagua ujenzi wa Stendi ya Mabasi ya Halmashauri ya Mtama, akiwa ziarani mkoani Lindi, leo tarehe 14 Novemba 2026.
Imetolewa na
Ofisi ya Makamu wa Rais
14 Novemba 2026
Mtama – Lindi.

0 Comments