Waziri wa Nchi Ofisi ya Makamu wa Rais (Muungano na Mazingira) Mhe. Mhandisi Hamad Yussuf Masauni akizungumza na Ujumbe kutoka Benki ya Maendeleo ya Afrika (AfDB) wakati wa mkutano wa pembezoni mwa Mkutano wa 31 wa Nchi Wanachama kuhusu Mabadiliko ya Tabianchi (COP31) unaofanyika Antalya, Uturuki.
Benki ya Maendeleo ya Afrika (AfDB) imeahidi kuipatia Tanzania dola za Marekani milioni 26 kwa ajili ya kufadhili miradi ya kukabiliana na mabadiliko ya tabianchi na kuimarisha ustahimilivu wa jamii dhidi ya athari zake.
Akizungumza katika mkutano wa pembezoni kati ya AfDB na Serikali ya Jamhuri ya Muungano wa Tanzania, Waziri wa Nchi Ofisi ya Makamu wa Rais (Muungano na Mazingira) Mhe. Mhandisi Hamad Yussuf Masauni ameishukuru Benki hiyo kwa kuitikia wito wa Rais wa Jamhuri ya Muungano wa Tanzania, Mhe. Dkt. Samia Suluhu Hassan, wa taasisi za kifedha kuongeza uwekezaji katika fedha, vifaa na teknolojia kwa ajili ya kukabiliana na mabadiliko ya tabianchi. Ameeleza kuwa AfDB imeendelea kuwa mshirika muhimu wa Tanzania kupitia ufadhili wa miradi ya kimkakati, ikiwemo: Dola milioni 9.4 kwa ajili ya kuimarisha ustahimilivu wa vyanzo vya maji vya Mto Mkondoa.
Dola 400,000 kupitia dirisha la ufadhili wa miradi ya mabadiliko ya tabianchi pamoja na Dola milioni 15 kwa ajili ya kuimarisha ustahimilivu wa maeneo ya pwani kupitia NEMC.
Aidha, AfDB imeendelea kutoa utaalamu na ushauri wa kiufundi katika kuendeleza biashara ya kaboni nchini, hatua inayofungua fursa zaidi za uwekezaji wa kijani na maendeleo endelevu.
Serikali imesisitiza dhamira yake ya kuendeleza ushirikiano na AfDB katika kulinda mazingira, kuimarisha ustahimilivu wa jamii na kujenga uchumi endelevu kwa manufaa ya Watanzania wa sasa na vizazi vijavyo
Waziri wa Nchi Ofisi ya Makamu wa Rais (Muungano na Mazingira) Mhe. Mhandisi Hamad Yussuf Masauni (katikati) akiwa katika picha ya pamoja na Ujumbe kutoka Benki ya Maendeleo ya Afrika (AfDB) na Tanzania mara baada ya mkutano wa pembezoni mwa Mkutano wa 31 wa Nchi Wanachama kuhusu Mabadiliko ya Tabianchi (COP31) unaofanyika Antalya, Uturuki.



0 Comments