NA FAUZIA MUSSA
WADAU wa kilimo na mazingira wamewataka vijana Zanzibar kutumia kilimo hai na mbinu endelevu za uzalishaji wa mazao kama njia ya kujiajiri, kuongeza kipato na kukabiliana na athari za mabadiliko ya tabianchi.
Wakizungumza katika mjadala wa mabadiliko ya tabianchi uliofanyika Maruhubi, Unguja, hivi karibuni, washiriki hao walisema kilimo kina nafasi kubwa katika kukabiliana na changamoto za mazingira, huku vijana wakihimizwa kuangalia fursa zilizopo katika mnyororo wa thamani wa sekta hiyo.
Walisema matumizi ya mbolea za asili, kupunguza utegemezi wa kemikali na kuimarisha mbinu zinazolinda rutuba ya udongo ni miongoni mwa hatua zinazoweza kusaidia kujenga mfumo wa kilimo unaozingatia uhifadhi wa mazingira na uzalishaji wa muda mrefu.
Mkurugenzi Mtendaji wa taasisi ya kilimo hai Msonge, Mwatima Juma, alisema kilimo kinaweza kuchangia katika kukabiliana na athari za mabadiliko ya tabianchi iwapo wakulima watazingatia mbinu zinazolinda mazingira na kuhifadhi uwezo wa ardhi kuzalisha kwa muda mrefu.
Alisema matumizi ya pembejeo za kemikali bila kuzingatia usimamizi sahihi wa udongo yanaweza kuongeza changamoto za uzalishaji, na kusisitiza umuhimu wa kuimarisha kilimo hai na matumizi ya mbolea zinazotokana na vyanzo vya asili.
Alieleza kuwa licha ya kilimo cha kisasa kuwa na shughuli kubwa za kibiashara, ni muhimu kuhakikisha maslahi ya kiuchumi hayaweki pembeni suala la afya ya udongo na uhifadhi wa mazingira.
Kwa mujibu wa Mwatima, wakulima wanapaswa kupewa elimu na kuhamasishwa kutumia mbinu zinazowezesha uzalishaji endelevu badala ya kutegemea matumizi ya kemikali pekee kama njia ya kuongeza mavuno.
Kwa upande wake, Mkurugenzi Mtendaji wa Pamoja Youth Initiative, Rashid Mwinyi, alisema changamoto mojawapo inayowakabili vijana katika sekta ya kilimo ni matarajio ya kupata matokeo ya haraka bila kuzingatia mchakato unaohitajika ili kuanzisha na kuendesha shughuli za uzalishaji.
Alisema vijana wengi wanakitambua kilimo kama shughuli inayoweza kuwapatia ajira na kipato, lakini baadhi yao hukwazwa na mchakato wa uzalishaji, upatikanaji wa ardhi, mitaji na rasilimali nyingine zinazohitajika kuendesha shughuli hizo.
Alifafanua kuwa hali hiyo haimaanishi vijana hawataki kilimo, bali wanahitaji mifumo inayorahisisha ushiriki wao na kuwawezesha kuona matokeo yenye tija ndani ya muda unaoeleweka.
Mwinyi alisema ili kuvutia vijana wengi zaidi, ni muhimu kuwawezesha kupata elimu ya kilimo, teknolojia zinazofaa, mitaji na masoko yatakayowasaidia kuzalisha kwa tija na kupata kipato.
Alisisitiza kuwa kilimo kinapaswa kuwasilishwa kwa vijana kama shughuli ya kiuchumi yenye fursa mbalimbali, badala ya kukichukulia kama kazi inayohitaji nguvu nyingi bila matarajio yanayoeleweka ya mafanikio.
Akizungumzia nafasi ya ujasiriamali wa kijani, Ali Shauri kutoka Green Organisation alisema kilimo endelevu na kinachozingatia uhifadhi wa mazingira kinaweza kuwa fursa muhimu ya biashara kwa vijana, huku kikichangia maendeleo ya uchumi.
Alisema vijana wanapaswa kuangalia zaidi ya shughuli za kulima na kuvuna, kwa kuwa sekta hiyo ina fursa katika hatua mbalimbali za uzalishaji, usambazaji na uuzaji wa mazao.
Alieleza kuwa matumizi ya mbolea za kemikali yanaweza kusaidia kuongeza mavuno katika mazingira fulani, lakini wakulima wanapaswa kuzingatia afya ya udongo na athari za muda mrefu za mbinu wanazotumia.
Alionya kuwa endapo ardhi itapoteza rutuba kutokana na usimamizi usiofaa, wakulima wanaweza kulazimika kutafuta maeneo mengine yenye uwezo mzuri wa kuzalisha, hali inayoweza kuongeza gharama na kuathiri uendelevu wa shughuli zao.
Aliwahimiza vijana kuzingatia mbinu za kilimo zinazohifadhi mazingira, akisema ujasiriamali wa kijani unaweza kuwa sehemu ya juhudi za kuongeza ajira na kipato huku ukisaidia kulinda rasilimali za asili.
Alisema mnyororo wa thamani wa kilimo una fursa nyingi ambazo vijana wanaweza kuzitumia, zikiwemo utoaji wa huduma za kitaalamu, uzalishaji wa miche, usambazaji wa pembejeo, ukusanyaji na usambazaji wa mazao pamoja na shughuli zinazounganisha wakulima na walaji.
Aliongeza kuwa vijana wanaweza pia kushiriki katika kutoa huduma za ushauri, kuendeleza teknolojia za kilimo na kushawishi sera zinazolenga kuboresha mazingira ya uzalishaji.
Alisema shughuli hizo zinaweza kuwapa vijana nafasi ya kujiajiri hata kama hawana uwezo wa kuanzisha mashamba makubwa, mradi wawe na ujuzi unaohitajika na mazingira yanayowawezesha kuanzisha biashara zao.
Kwa upande wa takwimu, Wizara ya Kilimo Zanzibar inaeleza kuwa sekta ya kilimo, mifugo, uvuvi na misitu ilichangia asilimia 24.3 ya Pato la Taifa mwaka 2024, ikionesha umuhimu wake katika uchumi wa visiwa hivyo.
Hata hivyo, ili kuongeza mchango wa sekta hiyo, ni muhimu kuimarisha uzalishaji na tija, kuongeza uwekezaji na kuwawezesha wakulima, wakiwemo vijana, kupata rasilimali na huduma zinazohitajika.
Wazungumzaji hao walitaja upatikanaji wa ardhi, mitaji, fedha na ujuzi wa kitaalamu kuwa miongoni mwa changamoto zinazoweza kuwazuia vijana kuanzisha au kupanua shughuli za kilimo.
Walisema juhudi za kuwavutia vijana zinapaswa kwenda sambamba na kutatua changamoto hizo na kusisistiza umuhimu wa kujenga mazingira ambayo vijana wataweza kutumia kilimo kama biashara yenye tija, huku wakizingatia mabadiliko ya tabianchi na uhifadhi wa mazingira.
Walieleza kuwa kuwawezesha vijana katika sekta hiyo hakutasaidia tu kuongeza fursa za ajira na kipato, bali pia kutaimarisha uzalishaji wa chakula na kuendeleza matumizi endelevu ya rasilimali za asili.

0 Comments