6/recent/ticker-posts

WAZIRI LELA ASISITIZA ELIMU JUMUISHI KUZINGATIWA KATIKA SERA NA SHERIA ZA ELIMU ZANZIBAR




Waziri wa Elimu na Mafunzo ya Amali Zanzibar, Mhe. Lela Muhamed Mussa, amesema Wizara ya Elimu Zanzibar inaendelea na juhudi za kuimarisha misingi ya elimu jumuishi kwa kuhakikisha inazingatiwa katika sera, sheria na mifumo ya kitaasisi, ili wanafunzi wote, wakiwemo wenye ulemavu, wapate fursa sawa za elimu.

Mhe. Lela ameyasema hayo wakati akifunga Kongamano la kwanza la Kimataifa la Elimu Jumuishi Zanzibar (Zanzibar International Inclusive Education Symposium – ZIIES) 2026, lililofanyika katika Ukumbi wa Hoteli ya Madinat Al Bahar, Unguja, ambalo limewakutanisha watafiti, wasomi, wataalamu wa elimu, mashirika ya watu wenye ulemavu na washirika wa maendeleo kwa ajili ya kubadilishana maarifa, tafiti na uzoefu kuhusu maendeleo ya elimu jumuishi.
Amesema mapitio yanayoendelea ya Sera ya Elimu Zanzibar na Sheria ya Elimu ni miongoni mwa hatua muhimu zinazolenga kuimarisha misingi hiyo, akieleza kuwa elimu jumuishi inapaswa kuwa sehemu ya wajibu wa kudumu wa mfumo wa elimu badala ya kutegemea miradi maalumu au misaada ya washirika wa maendeleo pekee.
Aidha, amezihimiza idara za kiufundi za Wizara, taasisi za kitaaluma, mashirika ya kiraia na washirika wa maendeleo kutumia maarifa na mapendekezo yaliyotokana na kongamano hilo katika kuimarisha mageuzi ya elimu na utekelezaji wake, huku akisisitiza umuhimu wa kuendelea kushirikiana na Mashirika ya Watu Wenye Ulemavu, yakiwemo SHIJUWAZA, ili kuhakikisha haki na mahitaji ya wanafunzi wenye ulemavu yanazingatiwa.
Katika hatua nyingine, Mhe. Lela ametoa shukrani kwa Chama cha Wanawake Wenye Ulemavu cha Norway, SHIJUWAZA, Mpango wa Madrasa wa Maendeleo ya Awali ya Mtoto Zanzibar na Chuo Kikuu cha Taifa cha Zanzibar (SUZA), pamoja na Shirika la Norad kupitia programu ya Collective Actions for Disability Rights (CADiR), kwa mchango wao katika kufanikisha kongamano hilo, huku akieleza matarajio ya kuona ZIIES ikiendelea kuwa jukwaa la kudumu la kimataifa la kubadilishana maarifa na uzoefu katika kuendeleza elimu jumuishi Zanzibar.
Kwa upande wake, Naibu Katibu Mkuu Utawala Wizara ya Elimu na Mafunzo ya Amali Zanzibar, Bw. Amos John Henock, amesema Wizara inatarajia kuwa kongamano hilo litatoa matokeo chanya kwa washiriki, kupitia maarifa na uzoefu walioupata katika mijadala na mawasilisho mbalimbali yaliyofanyika, yatakayowasaidia kuboresha utekelezaji wa elimu jumuishi.
Amesema ni matarajio ya Wizara pia kuona washiriki watatumia taaluma waliyoipata katika kuboresha mazingira ya kujifunzia na kufundishia, ili kuhakikisha kila mwanafunzi anapata fursa sawa ya kujifunza kwa kuzingatia mahitaji yake.
Nae Mkurugenzi Mkazi wa NAD Zanzibar kutoka ZIIES, Bw. Abdulla Amour, ameishukuru Wizara kwa ushirikiano wake katika kufanikisha kongamano hilo, akieleza kuwa hatua hiyo inaonesha dhamira ya Serikali ya kuzipa nafasi taasisi binafsi kushiriki katika maendeleo ya sekta ya elimu.
amesema miongoni mwa maazimio yaliyofikiwa ni kuhakikisha kila mwanafunzi anapata fursa sawa ya kujifunza, huku akieleza kuwa maazimio hayo yatakuwa chachu ya kuleta mabadiliko katika utekelezaji wa elimu jumuishi katika nchi zao.
Imetolewa na Kitengo cha Habari, Uhusiano na Mawasiliano – WEMA

Post a Comment

0 Comments