6/recent/ticker-posts

MWENYEKITI WA THBUB AKUTANA NA JAJI MKUU WA ZANZIBAR, WAJADILI KUIMARISHA USHIRIKIANO KATIKA UTOAJI HAKI

Tume ya Haki za Binadamu na Utawala Bora (THBUB), imesema inatambua mchango mkubwa wa Mahakama katika kusimamia Utawala wa Sheria.

Mwenyekiti wa Tume hiyo, Mhe. Wakili Dunford George Mpelumbe ameyasema hayo, leo Novemba 18, 2026 ofisini kwa Jaji Mkuu wa Zanzibar, Tunguu Wilaya ya Kati, Mkoa wa Kusini Unguja ikiwa ni mwendalezo wa ziara zake za kikazi katika taasisi mbalimbali zilizopo chini ya Wizara ya Katiba na Sheria ya Serikali ya Mapinduzi ya Zanzibar, (SMZ).

Aidha, Wakili Mpelumbe ameongeza kuwa Tume itaendelea kushirikiana kwa karibu na vyombo vya utoaji haki visiwani Zanzibar, hususan katika utoaji wa elimu kwa umma na kushughulikia malalamiko ya wananchi.

Naye, Jaji Mkuu wa Zanzibar, Mhe. Khamis Ramadhan Abdalla, ameupongeza uongozi mpya wa THBUB kwa kuteuliwa na kuaminiwa kushika nyadhifa walizonazo sasa.

Mhe. Abdalla Amemhakikishia Wakili Mpelumbe kuwa Mahakama Kuu ya Zanzibar ipo tayari kuendeleza na kuimarisha ushirikiano uliopo baina ya THBUB na Mahkama hiyo, ili kuhakikisha mifumo ya utoaji haki inakuwa jumuishi, yenye ufanisi, na inayokidhi matarajio ya wananchi.

Katika mazungumzo yao, viongozi wawili hao pia wamejadili mikakati ya kuimarisha ushirikiano wa kikazi baina ya THBUB na Mahakama Kuu ya Zanzibar kwa lengo la kuhakikisha haki za binadamu zinalindwa, misingi ya utawala bora inaheshimiwa, na wananchi wanapata haki kwa wakati bila ya upendeleo wowote.

Ziara hiyo ya Mwenyekiti Mahakamani hapo ameambatana na Makamu Mwenyekiti wake, Mhe. Omar Ali Omar pamoja na Naibu Katibu Mtendaji wa THBUB, Bw. Juma Msafiri Karibona ni mwendelezo wa ziara zao za kikazi, visiwani Zanzibar zikiwa na lengo la kujitambulisha rasmi kwa viongozi wa juu wa Serikali ya Mapinduzi ya Zanzibar (SMZ) na taasisi za sheria visiwani hapa, tangu walipoteuliwa na kuapishwa na Mhe. Rais wa Jamhuri ya Muungano wa Tanzania, Dkt. Samia Suluhu Hassan hivi karibuni.



Post a Comment

0 Comments