MWENYEKITI WA THBUB AKUTANA NA KATIBU MKUU KIONGOZI ZANZIBAR

Mwenyekiti wa Tume ya Haki za Binadamu na Utawala Bora (THBUB), Mhe. Wakili Dunford George Mpelumbe, amesema Tume itaendelea kuimarisha ushirikiano na Serikali ya Mapinduzi ya Zanzibar (SMZ) katika kutekeleza majukumu yake ya Kikatiba, hususan kutoa elimu kwa umma na kushughulikia malalamiko ya wananchi kwa haki, usawa na bila upendeleo.

Mhe. Mpelumbe ameyasema hayo alipokutana na Katibu wa Baraza la Mapinduzi na Katibu Mkuu Kiongozi wa Serikali ya Mapinduzi ya Zanzibar, Mhe. Mansura Mosi Kassim, katika Ofisi za Ikulu Zanzibar, alipofika kujitambulisha rasmi kufuatia kuteuliwa na kuapishwa na Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Katika mazungumzo hayo, Mhe. Mpelumbe amemshukuru Katibu Mkuu Kiongozi kwa mapokezi mazuri na kupongeza juhudi zinazochukuliwa na Serikali ya Mapinduzi ya Zanzibar katika kuimarisha misingi ya utawala bora na kuhakikisha wananchi wanapata haki.

Kwa upande wake, Mhe. Mansura amempongeza Mwenyekiti huyo pamoja na uongozi mpya wa THBUB kwa kuaminiwa na Mhe. Rais wa Jamhuri ya Muungano wa Tanzania na kuteuliwa kushika nyadhifa zao. Aidha, ameahidi kuwa Serikali ya Mapinduzi ya Zanzibar itaendelea kutoa ushirikiano wa dhati kwa Tume ili kufanikisha juhudi za kulinda na kutetea haki za binadamu, kuimarisha uwajibikaji katika utumishi wa umma na kusimamia misingi ya utawala bora.

Ziara hiyo ya kikazi, ambayo imehudhuriwa pia na Makamu Mwenyekiti wa THBUB, Mhe. Omar Ali Omar, pamoja na Naibu Katibu Mtendaji, Bw. Juma Msafiri Karibona, imelenga kujitambulisha kwa viongozi wa juu wa Serikali ya Mapinduzi ya Zanzibar na kujadili mikakati ya kuimarisha ushirikiano baina ya Tume na taasisi za Serikali hiyo katika kukuza, kulinda na kutetea haki za binadamu pamoja na misingi ya utawala bora visiwani Zanzibar.

Katika mwendelezo wa ziara hiyo, Mhe. Mpelumbe akiwa ameongozana na Makamu Mwenyekiti wake na Naibu Katibu Mtendaji, amekutana pia na Kamishna wa Jeshi la Polisi Zanzibar, CP Kombo Khamis Kombo, kwa mazungumzo ya kikazi yaliyolenga kuimarisha ushirikiano katika maeneo ya utekelezaji wa majukumu yao.

Ziara hiyo ni sehemu ya mwendelezo wa mikutano ya kujitambulisha kwa Mwenyekiti na Makamu Mwenyekiti wa THBUB tangu walipoapishwa na Mhe. Rais na kukabidhiwa rasmi majukumu yao, ikiwa na lengo la kujenga mahusiano ya kikazi na wadau mbalimbali na kuimarisha ushirikiano katika kulinda haki za binadamu na kusimamia utawala bora nchini.