6/recent/ticker-posts

Baiskeli 300 Kukabidhiwa Wahudumu wa Afya Ngazi ya Jamii Kuwafikia Wananchi Kwa Urahisi Zaidi

Na,Mwandishi Wizara ya Afya Zanzibar.

WIZARA ya Afya Zanzibar imepokea msaada wa baiskeli 300 kutoka Kampuni ya Buffalo Tanzania, zitakazotumika kuwawezesha Wahudumu wa Afya Ngazi ya Jamii kuwafikia wananchi kwa urahisi zaidi na kuimarisha utoaji wa huduma za afya, hususan katika juhudi za kupunguza vifo vya mama na mtoto.

Akizungumza mara baada ya kupokea msaada huo, Katibu Mkuu wa Wizara ya Afya Zanzibar, Dkt. Mngereza Mzee Miraji, amesema baiskeli hizo zitakuwa chachu ya kuimarisha huduma za afya katika jamii kwa kuwawezesha wahudumu kufanya ufuatiliaji wa karibu wa wananchi katika wilaya mbalimbali za Unguja na Pemba.

Amesema lengo la msaada huo ni kuhakikisha Wahudumu wa Afya Ngazi ya Jamii wanawafikia wananchi katika maeneo yao wanayoishi, ikiwemo maeneo ya mbali, ili kutoa elimu ya afya, kufuatilia hali za wananchi na kuhakikisha wanapata huduma zinazohitajika kwa wakati.

Aidha, amewataka wahudumu hao kuzitumia baiskeli hizo kwa uangalifu na kuzitunza ili ziweze kudumu na kutumika kwa muda mrefu.

Kwa upande wake, Mkurugenzi Mtendaji wa Kampuni ya Buffalo Tanzania, Bena Mgeni, amesema kampuni hiyo imeamua kuunga mkono juhudi za Serikali ya Mapinduzi ya Zanzibar katika kuimarisha sekta ya afya, kwa kutambua umuhimu wa huduma zinazotolewa na wahudumu wa afya katika ngazi ya jamii.

Ameahidi kuendelea kushirikiana na Serikali katika juhudi za kuboresha huduma hizo, huku akiwahimiza wahudumu kuzitumia baiskeli hizo kufanya ziara za nyumba kwa nyumba ili kuongeza ufanisi katika majukumu yao ya kila siku.

Naye Mratibu wa Wahudumu wa Afya Ngazi ya Jamii Zanzibar, Halima Ali Khamis pamoja na wahudumu wa Afya Ngazi ya Jamii, Mwinyi Ameir Mwinyi na Pili Halfan Shija, wameishukuru Kampuni ya Buffalo Tanzania kwa msaada huo, akieleza kuwa baiskeli hizo zitagawiwa kwa wahudumu wa Unguja na Pemba ili kurahisisha utekelezaji wa majukumu yao.

Wamefahamisha kuwa katika awamu ya kwanza, baiskeli hizo zitaanza kugawiwa kwa wahudumu wa Mkoa wa Mjini Magharibi Unguja, zikiambatana na vifaa vya matengenezo, kabla ya kuendelea kusambazwa katika wilaya nyingine.

Wameongeza kuwa kipaumbele cha ugawaji wa baiskeli hizo kitakuwa kwa wahudumu wanaoishi na kufanya kazi katika maeneo ya mbali ambao wamekuwa wakikabiliwa na changamoto ya usafiri wanapowafikia wananchi kwa ajili ya kutoa huduma mbalimbali za afya.

Wamesema hatua hiyo inalenga kuongeza ufanisi wa huduma za afya katika jamii na kuunga mkono azma ya Serikali ya kuhakikisha huduma za afya zinapatikana kwa wote, huku wakiwahimiza wadau wengine kujitokeza kuchangia upatikanaji wa baiskeli zaidi ili kuwafikia wananchi wengi zaidi.

Mwisho.

 

 

Post a Comment

0 Comments