6/recent/ticker-posts

Lugha ya Kiswahili Imepiga Hatua Kubwa Kimataifa Kutokana na Kuongezeka Kwa Matumizi Katika Taasisi za Kimataifa

Waziri wa Nchi, Ofisi ya Rais Katiba Sheria Utumishi na Utawala Bora Mh. Haroun Ali Suleiman amesema lugha ya Kiswahili imepiga hatua kubwa kimataifa kutokana na kuongezeka kwa matumizi katika Taasisi za kimataifa, ikiwemo Shirika la Umoja wa Mataifa la Elimu, Sayansi na Utamaduni (UNESCO).

Mwalim Haroun ameyasema hayo wakati alipokuwa akifunga Kongamano la kumi (10) la Kiswahili la Kimataifa, lililofanyika katika Ukumbi wa Polisi Ziwani Wilaya ya Mjini.

Amesema lugha ya Kiswahili ni miongoni mwa lugha zinazokua na kuenea kwa kasi Duniani ambapo pia ni daraja muhimu la mawasiliano baina ya Watu na mataifa mbalimbali, hususan ukanda wa Afrika Mashariki na Kati.

Aidha amesema ni vyema kwa Baraza la Kiswahili (BAKIZA) kutumia mifumo ya Kidigiti katika kukuza na kueneza lugha ya Kiswahili bila kupoteza uhalisia, ladha na uzito wake sambamba na kuunganisha Utamaduni na Watu Duniani.

Waziri Haroun, ameitaka jamii kutumia lahaja mbalimbali, zinazotokana na lugha ya Kiswahili kwani ni Utambulisho wetu na sauti zilizotokana na wazee wetu hivyo kutumia lugha hizo ni kuzithamini na kuihifadhi historia ya Lugha ya Kiswahili.

Pia amelitaka BAKIZA, kuanda Tunzo maalum kwa Washirika wa lugha na Utamaduni mbalimbali, kwa lugha ya Kiswahili ili kuthamini mchango waliotoa katika kukikuza na kukieneza Kiswahili Duniani kote.

Kwa upende wake Waziri wa Habari, Sanaa, Utamaduni na Michezo Mhe. Dkt. Riziki Pembe Juma amesema Kongamano la 10 la Kiswahili la kimataifa, lililoandaliwa na Wizara ya Habari, Sanaa, Utamaduni na Michezo kwa kushirikiana na BAKIZA, limeleta mafanikio makubwa na kuhakikisha lugha ya Kiswahili ili kushika kasi katika kuendeleza maendeleo nchini.

Hata hivo amewashukuru wageni wote kutoka mataifa tofauti waliohudhuria na kufanikisha Kongamano hilo, na kuahidi kuwa Serikali kupitia Wizara itahakikisha lugha ya Kiswahili, inakuwa Zaidi na kufikia mataifa yote Duniani.

Mbali na hayo Washiriki wa Kongamano hilo, walitembelea maeneo ya Utalii katika Wilaya ya Kati, Mkoa wa Kusini Unguja, ikiwemo eneo la Mwinyi Mkuu Dunga na Bihole Bungi ambapo ni sehemu ya Utaratibu wa kuwapatia wageni fursa ya kuifahamu historia na urithi wa Zanzibar.

Imetolewa na Kitengo cha Habari Zanzibar,

 WHSUM.

Post a Comment

0 Comments