Makamu wa Pili wa Rais wa Zanzibar amewasisitiza Viongozi wa Serikali kuimarisha usimamizi wa matumizi ya fedha za umma kwa kuhakikisha fedha hizo zinatumika kwa manufaa ya wananchi.
Ameyasema hayo alipokuwa akizungumza na vingozi na watendaji wa taasisi zilizomo katika Wilaya ya Mkoani ikiwa ni muendelezo wa ziara yake ya kukagua miradi ya maendeleo na kusikiliza changamoto za Wananchi katika wa Mkoani.
Amesema fedha za Serikali zinapaswa kuelekezwa zaidi katika utekelezaji wa miradi ya maendeleo inayogusa maisha ya wananchi kama vile ujenzi wa miundombinu mbali mbali inayotoa huduma za kijamii ili wanachi waweze kunufaika na rasilimali za Serikali.
Makamu wa Pili wa Rais amesisitiza umuhimu wa kuimarisha ukusanyaji wa mapato ya Serikali kwa kuhakikisha kila mtu anayestahiki kulipa kodi analipa kwa wakati ili kutoa fursa kwa Manispaa na Mabaraza ya Miji kutekeleza miradi ya maendelelo waliyojipangia.
Mhe. Hemed amelitaka Jeshi la Polisi kuhakikisha wanadhibiti ongezeko la ajali za barabarani ili kupunguza vifo visiyokuwa vya lazima, upotevu wa mali na kupata ulemavu wa kudumu kwa wapatwa na ajali hao.
Makamu wa Pili wa Rais wa Zanzibar amewataka wafanyabiashara wanaoingiza bidhaa nchini kuhakikisha wanafuata masharti ya vibali walivyopewa kwa kuingiza bidhaa Nchini na kueleza kuwa hatua za kisheria zitachukuliwa kwa yoyote atakaeingiza bidhaa kinyume na makubaliano ya kimkataba.
Akikagua ujenzi wa mradi wa chuo cha Mafunzo ya Amali Chambani Mhe. Hemed amesema Kituo hicho kina uhitaji mkubwa na kumuagiza Mkandarasi kumaliza ujenzi huo kwa wakati uliopangwa ili lengo la Serikali la kuwaendeleza vijana katika vyuo vya amali liweze kufikiwa.
Aidha, Mhe. Hemed amewataka wananchi wa kijiji cha Kalani na vitongoji vyake ambao wameshalipwa fidia zao kuondoka katika maeneo hayo kupisha ujenzi wa barabara ya KALANI uweze kuendelea ambapo utakapomalizika utarahisisha huduma ya usafiri na usafirishaji kwa wananchi wa maeneo hayo.
Kwa upande wake Mkuu wa Wilaya ya Mkoani ndugu MIZA HASSAN FAKI amesema mwamko na muitikio wa wananchi katika kupambana na vitendo vya udhalilishaji na ukatili wa kijinsia umekuwa mkubwa ambapo wananchi wamekuwa na utayari wa kushirikiana na vyombo vya ulinzi na usalama katika kutoa ushahidi wa kesi za udhalilishaji na kuviwezesha vyombo vya sheria kufanya kazi zao kwa urahisi.
Amesema Sekta ya elimu inazidi kuimarika ambapo Wilaya kwa kushirikiana na Wizara ya elimu wameweka mikakati madhubuti itakayowawezesha wanafunzi na walimu kusoma katika mazingira bora na walimu kutekeleza majukumu yao kwa ufanisi mkubwa.
Ndugu Miza amefahamisha kuwa Wilaya ya Mkoani inaendela kutoa elimu kwa wananchi juu ya umuhimu wa kulipa kodi kwa hiari na kuwa na utayari wa kusaidia katika udhibiti wa mapato ya Serikali kwa kudai na kutoa Risiti wanapouza na kununua bidhaa mbali mbali.
Wananchi wa Wilaya ya Mkoani wameiomba Serikali kujengewa Dakhalia katika Skuli ya Sekondari Uweleni ili kuwaondoshea usumbufu wa ukosefu wa makaazi kwa wanafunzi wanaosoma skulini hapo sambamba na kujengewa kisima katika eneo la Mkoani Mapinduzi ambako huduma ya maji safi na salama imekosekana kwa muda mrefu.
Wameiomba Serikali kuiangalia kwa Karibu Ofisi ya Mamlaka ya usajili wa matukio ya kijamii hasa katika upatikanaji wa vyeti vya kuzaliwa ili kudhibiti wimbi la vyeti vya visivyokidhi viwango na kusababisha usumbufu kwa wananchi wanaofika kufuata huduma katika Taasisi mbali mbali.
Katika ziara hiyo Makamu wa Pili wa Rais wa Zanzibar amekagua mradi wa UJENZI WA JENGO LA UTAWALA LA BANDARI YA MKOANI, MRADI WA UJENZI WA MAEGESHO YA MAGARI NG'OMBENI, MRADI WA UJENZI WA BARABARA YA KUYUNI - KAALANI, MRADI WA UJENZI WA CHUO CHA MAFUNZO YA AMALI CHAMBANI NA MRADI WA UJENZI WA DISPENSARI UKUTINI.
Imetolewa na Kitengo cha Habari ( OMPR )
Leo tarehe 17 / 11 / 2026
0 Comments