Mbunge, DC wamwaga pikipiki

Na Vicent Marwa,Simiyu

Mbunge wa jimbo la Kisesa (CCM) wilayani Meatu, mkoani Simiyu, Luhaga Mpina na Mkuu wa wilaya hiyo, Rosemary Kirigini, wametoa pikipiki 25 zenye thamani ya shilingi milioni 55 kwa Chama Cha Mapinduzi wilayani humo.

Akizungumza baada ya makabidhiano hayo, Mpina alisema pikipiki hizo zitagawiwa kwa Makatibu wa kata wa CCM katika wilaya hiyo kwa lengo la kuimarisha shughuli za chama.

“Sisi tukiwa makada wa CCM kwa pamoja tumeamua kushirikiana kwa pamoja na tukapata pikipiki hizi 25 kwa kila Kata zilizoko ndani ya wilaya yetu hivyo tumeona tuwapatie Makatibu wa Kata ili tuboreshe utendaji kazi wao,” alisema.

Kwa upande wake, Mkuu wa wilaya hiyo,Kirigini ambaye pia ni Mbunge wa viti maalum CCM mkoa wa Mara, alisema ni vizuri pikipiki hizo zikatumiwa kama zilivyokusudiwa na siyo kuzigeuza boda boda.

Akishukuru kwa niaba ya Makatibu kata,Katibu wa CCM kata ya Mwanhuzi, Mawazo Shabani, alisema mbali na kuwapongeza viongozi hao aliongeza kuwa sasa utendaji wa kazi zao utakuwa rahisi kwani wataweza kufika maeneo yao kwa wakati.

Diwani wa kata ya Mwanhuzi, Eliya Shukia akizungumza kwa niaba ya CCM wilayani humo pia aliwashukuru viongozi hao kwa kitendo walichokifanya na kueleza kuwa  huo ni mwanzo mzuri wa chama hicho kuelekea katika uchaguzi ujao wa serikali za mitaa na uchaguzi mkuu unaotarajia kufanyika mwakani.