Utamaduni ni Sehemu Muhimu ya Utambulisho wa Wazanzibari,

WANANCHI wametakiwa kutumia fursa zinazotokana na utamaduni, sanaa na michezo katika kujiletea maendeleo na kuongeza kipato, hususan kuelekea maandalizi ya Mashindano ya Kombe la Mataifa ya Afrika (AFCON) 2027.

Wito huo ulitolewa.na Waziri wa Habari, Sanaa, Utamaduni na Michezo, Dkt. Riziki Pembe Juma, wakati akifunga Tamasha la 31 la Utamaduni wa Mzanzibar lililofanyika Katika uwanja wa Culture Musical Club, Vuga, Zanzibar, ikiwa ni Usiku wa Utamaduni.

Alisema fursa kubwa iliyopo kuelekea AFCON 2027 inapaswa kutumiwa na wananchi, hasa wasanii na wajasiriamali wa sekta ya utamaduni, kwa kutengeneza bidhaa na huduma zinazobeba utambulisho wa Zanzibar.

Alisema utamaduni ni sehemu muhimu ya utambulisho wa Wazanzibari, hivyo jamii inapaswa kuendelea kuenzi mila, desturi, sanaa na michezo na kuhakikisha vinaendelezwa kwa vizazi vya sasa na vijavyo.

“Tunapaswa kutumia nafasi hii kwa utamaduni wetu, sanaa zetu na michezo, kwa sababu ni fursa ambayo inaweza kutuletea maendeleo,” amesema. Dkt Riziki .

Aidha, alisema kuwa Serikali na wadau mbalimbali wameendelea kushirikiana katika kuandaa mazingira rafiki yatakayowawezesha wananchi kushiriki katika shughuli mbali mbali za kujipatia kipato wakati wa mashindano ya afcone 2027.

Alifahamisha kwamba shughuli za utamaduni kama ngoma, sanaa mbalimbali na michezo zina nafasi kubwa katika kuwakutanisha wananchi, kuimarisha mshikamano na kuendeleza urithi wa Zanzibar.

Aliwataka wananchi kuendelea kushirikiana na Serikali katika kuhakikisha utamaduni wa Zanzibar unalindwa na kutumika kama nyenzo ya maendeleo.

"LLeo tunafanya juhudi hizi na kesho tunatarajia vizazi vijavyo vitaendeleza yale tunayoyafanya leo,” alisema. Dkt Riziki

Alisisitiza kuwa fursa zinazotokana na utamaduni, sanaa na michezo zinapaswa kutumiwa kwa manufaa ya wananchi na Taifa kwa ujumla, hasa katika kipindi ambacho Zanzibar inaendelea kujiandaa kupokea wageni kutoka mataifa mbalimbali kuelekea AFCON 2027.

Aidha, alisema kaulimbiu ya Tamasha la 31 la Utamaduni wa Mzanzibar, “Utamaduni wetu ni Urithi kwa Vizazi vyetu; Tumia Fursa za Utamaduni kwenye AFCON 2027,” inalenga kuhamasisha wananchi kutumia utamaduni kama fursa ya kujiletea maendeleo.

Mapema Dkt Riziki alimshukuru Rais wa Zanzibar na Mwenyekiti wa Baraza la Mapinduzi, Dkt. Hussein Ali Mwinyi, kwa maono yake katika kuenzi, kulinda na kudumisha utamaduni wa Mzanzibar, pamoja na kuweka mazingira yanayowezesha utamaduni kuwa sehemu ya maendeleo ya kiuchumi na kijamii.