Jamii ya Zanzibar Kuendelea Kulinda, Kutunza na Kudumisha Utamaduni wa Mzanzibar

Waziri wa Habari, Sanaa, Utamaduni na Michezo, Mhe. Dkt. Riziki Pembe Juma, ameitaka jamii ya Zanzibar kuendelea kulinda, kutunza na kudumisha utamaduni wa Mzanzibar, sambamba na kuendeleza kazi za sanaa kwa ajili ya manufaa ya kizazi cha sasa na kijacho.

Amesema hayo wakati wa ziara maalumu ya kuwatembelea wasanii na wajasiriamali wanaojishughulisha na shughuli mbalimbali zinazohusiana na sanaa na utamaduni katika maeneo ya Wete na Micheweni, Pemba.

Ziara hiyo ni sehemu ya shughuli za wiki ya uzinduzi wa Tamasha la 31 la Utamaduni wa Mzanzibar, linalolenga kuhamasisha jamii kutambua, kuthamini na kuendeleza utamaduni wa Zanzibar.

Amesema utamaduni wa Mzanzibar ni hazina yenye historia na utambulisho wa jamii, hivyo kuna umuhimu wa kuuhifadhi kwa kutumia njia za kisasa ili uwe kumbukumbu muhimu kwa vizazi vijavyo.

Aidha, Dkt. Riziki amesema sanaa si burudani pekee, bali ni ajira na chanzo cha uchumi kwa wananchi, huku ikichangia kuhifadhi mila, desturi na utamaduni wa Zanzibar.

“Sanaa ni ajira, sanaa ni uchumi, na sanaa pia ni nyenzo ya kusafirisha utamaduni wetu na kuinua wananchi kiuchumi,” amesema.

Amewataka wasanii wa fani mbalimbali kuendelea kubuni mitindo na bidhaa mpya za sanaa zinazokidhi mahitaji ya soko, ili kuwawezesha kupata masoko ya uhakika na kuongeza thamani ya kazi zao.

Dkt. Riziki pia amewataka watendaji wa Wizara ya Habari, Sanaa, Utamaduni na Michezo kuendelea kushirikiana na wasanii na wadau wa sekta hiyo katika kuweka mazingira bora ya kukuza vipaji na kuhifadhi kazi za sanaa za Zanzibar, sambamba na kuhakikisha wasanii wakongwe wanapata mirabaha inayostahili.

Dkt. Riziki ametoa wito kwa jamii kuendelea kushirikiana na Serikali katika kulinda na kuendeleza sanaa na utamaduni wa Zanzibar, huku akimshukuru Rais wa Zanzibar na Mwenyekiti wa Baraza la Mapinduzi, Dkt. Hussein Ali Mwinyi, kwa kuendelea kuweka msisitizo katika maendeleo ya sanaa na utamaduni nchini.

Amesema Wizara itaendelea kuhakikisha kazi za sanaa na utamaduni zinahifadhiwa kwa njia za kisasa ili ziwe kumbukumbu na historia muhimu kwa vizazi vya sasa na vijavyo.

Kwa upande wao, wasanii na wajasiriamali walitembelewa wamesema sanaa ni ajira kama zilivyo ajira nyingine, hivyo jamii inapaswa kuithamini na kuitunza kwa kuzingatia mila, desturi na utamaduni wa Mzanzibar.

Mmoja wa wajasiriamali, Bi. Awena Hamad Khamis, kutoka Bopwe Mibunini, amewahimiza wanawake wenzake kujishughulisha na shughuli za sanaa na ujasiriamali, akisema hatua hiyo inaweza kuwasaidia kujikwamua kiuchumi na kuongeza kipato cha familia.