MMUYA AAGIZA AMBULANCE YA LUCHELEGWA KUREJESHWA

Mbunge wa Jimbo la Ruangwa na Naibu Waziri wa Ardhi, Nyumba na Maendeleo ya Makazi, Mhe. Kaspar Mmuya, akizungumza na wananchi wa Kata ya Luchelegwa wakati wa ziara yake ya kusikiliza na kutatua hoja mbalimbali zinazowakabili wananchi wa jimbo hilo.

Mbunge wa Jimbo la Ruangwa na Naibu Waziri wa Ardhi, Nyumba na Maendeleo ya Makazi, Mhe. Kaspar Mmuya, ameitaka Halmashauri ya Ruangwa kuchukua hatua za haraka kurejesha ambulance katika Kituo cha Afya Luchelegwa ili wananchi wa eneo hilo waweze kuendelea kupata huduma za afya kwa wakati.

Mhe. Mmuya ametoa agizo hilo wakati wa ziara yake ya kusikiliza na kutatua hoja mbalimbali za wananchi wa Jimbo la Ruangwa, baada ya Bi. Rukia Mwambe kuwasilisha malalamiko kuhusu kutokuwepo kwa ambulance katika kituo hicho, licha ya gari hilo kukabidhiwa rasmi na kuanza kutumika kuwahudumia wananchi.

Akitoa ufafanuzi kuhusu suala hilo, Kaimu Afisa Mipango wa Halmashauri ya Ruangwa, Bi. Aloycia Subira, alieleza hali ilivyo, ambapo Mhe. Mmuya alimtaka Kaimu Mganga Mkuu wa Wilaya ya Ruangwa, Dkt. Abdul Chilala, kuchukua hatua za haraka kuhakikisha ambulance hiyo inarejeshwa katika Kituo cha Afya Luchelegwa.

Mhe. Mmuya amesema kurejeshwa kwa ambulance hiyo ni muhimu ili kuwawezesha wananchi kupata huduma za afya kwa wakati, hususan wagonjwa wanaohitaji usafiri wa haraka kwenda kupata matibabu katika vituo vya afya.

Amesisitiza kuwa hoja zinazowasilishwa na wananchi zinapaswa kufanyiwa kazi kwa wakati na kutolewa majibu yanayolenga kutatua changamoto zinazowakabili, hususan katika huduma muhimu za kijamii.

Baadhi ya wananchi wa Kata ya Luchelegwa waliojitokeza wakati wa ziara ya Mbunge wa Jimbo la Ruangwa na Naibu Waziri wa Ardhi, Nyumba na Maendeleo ya Makazi, Mhe. Kaspar Mmuya, ya kusikiliza na kutatua hoja mbalimbali zinazowakabili.

Mbunge wa Jimbo la Ruangwa na Naibu Waziri wa Ardhi, Nyumba na Maendeleo ya Makazi, Mhe. Kaspar Mmuya, akiwa ameambatana na baadhi ya wananchi mara baada ya ziara yake ya kusikiliza na kutatua hoja mbalimbali jimboni humo.