Serikali ya Mapinduzi ya Zanzibar imekuwa ikifanya juhudi mbali mbali za kuhakikisha utamaduni wa mzanzibari unadumishwa, unaendelezwa, unarithiwa kwa maslahi mapana ya vizazi hadi vizazi.
Hayo yamesemwa na Makamu wa Pili wa Rais wa Zanzibar Mhe. Hemed Suleiman Abdulla kwa niaba ya Rais wa Zanzibar na Mwenyekiti wa Baraza la Mapinduzi Mhe. Dkt Hussein Ali Mwinyi katika hafla ya ufunguzi wa Tamasha la 31 la Utamaduni wa Mzanzibari liliofanyika katika Uwanja wa Gombani Pemba.
Amesema kuwa Serikali imefanikiwa kujenga nyumba ya kisasa ya sanaa iliyopo kwerekwe unguja na kujenga nyumba ya kisasa ya sanaa kisiwani Pemba sambamba na kupanga kutumia Bilioni 40 kwa ajili ya kujenga kijiji cha utamaduni kitakachosaidia kuitangaza Zanzibar kiutalii, Kitaifa na Kimataifa.
Makamu wa pili wa rais wa Zanzibar amesema ujenzi wa kijiji hicho utahusisha ujenzi wa Chuo Kikuu cha Utamaduni na Sanaa, vituo vya kisanaa kwa ajili ya wenyeji na wageni, maeneo ya maonesho ya shughuli za utamaduni, Maktaba na maeneo ya Makumbusho ya kiutamaduni.
Mhe. Hemed ameeleza kuwa kitakapokamilika kijiji cha Utamaduni kitachochea wageni wengi kutembelea Zanzibar na kutoa fursa mbalimbali kwa wananchi wa Zanzibar ikiwemo ajira, kuuza bidhaa za kitamaduni, vijana kupata maarifa juu ya kazi za kiutamaduni na ubunifu ambayo yatawawezesha kuzalisha bidhaa na kubuni kazi za Sanaa ambazo zitawasaidi kupata kipato.
Sambamba na hayo Mhe. Hemed amewataka vijana, wajasiriamali, wasanii na wananchi wote kuitumia fursa ya ujio wa mashindano ya Afkon 2027 kuwa ni fursa ya kiuchumi, kijamii na kiutamaduni ambao utumike kuwa ni kivutio cha wageni kuitembelea Zanzibar sambamba na kulinda na kudumisha mila, silka na desturi za Mzanzibari.
Aidha, Mhe. Hemed ameeleza kwamba Dira ya Maendeleo ya 2050 imeelekeza kuifanya Zanzibar kuwa kitovu cha lugha ya Kiswahili na utajiri wa utamaduni wa mswahiki kwa kuimarisha Taasisi za utafiti na kuhakikisha utamaduni wa Mzanzibari unadumishwa, unaendelezwa na unarithishwa vizazi hadi vizazi.
Hata hivyo, Makamu wa Pili wa Rais amewakumbusha wananchi kwamba Mamlaka ya Hali ya Hewa Tanzania ( TMA ) imewataka kuchukua tahadhari kufuatia mvua kubwa za vuli zinazotarajiwa kuambatana na El-Nino kwa kuhama katika maeneo hatarishi, mabondeni, katika njia za asili za maji pamoja na kuendelea kusafisha mitaro ya maji ya mvua na kuendela kufuatilia tarifa zinazotolewa kupitia ngazi zote za Serikali.
Nae Waziri wa Habari, Sanaa Utamaduni na Michezo Mhe. Dkt. Riziki Pembe Juma amesema wakati umefika wa kuunganisha nguvu za pamoja katika kuenzi, kulinda na kuendeleza Mila, Silka na Tamaduni za Kizanzibari ambao unaendelea kuitangaza Zanzibar Kitaifa na Kimataifa na kuwa urithi bora kwa vizazi vijavyo.
Dkt. Riziki amesema endapo Utamaduni utaenziwa na kuendelezwa kwa vitendo utakuwa ni sehemu ya Utalii ambao utawavutia watu mbalimbali watakaotembelea Zanzibar.
Ameahidi kuwa Wizara ya Habari, sanaa, utamaduni na michezo itaendelea kushirikiana na wananchi na wadau wote katika kulinda na kuendeleza Utamaduni kwa kuhakikisha unarithishwa vizazi kwa vizazi ili Zanzibar iendelele kutambulikana kupitia Utamaduni wake.
Kwa upande wake Katibu Mkuu Wizara ya Habari, Sanaa, Utamaduni na Michezo ndugu MATTAR ZAHOR MASSOUD amesema Tamasha la Mzanzibari linatimiza miaka 31 tangu kuanzishwa kwake lenye lengo la kujitathmini na kuangalia fursa zinazopatikana katika kuuwenzi, kuudumisha na kuuendeleleza utamaduni wa Mzanzibari ili uendelee kurithiwa vizazi kwa vizazi.
Mattar amesema kwa sasa Wizara inajipanga kuhakikisha uwepo wa Sera, Sheria na Miongozo madhubuti ambayo itaendeleza na kulinda utamaduni wa Mzanzibari na kukemea vitendo vyote vya uvunjifu wa maadili na kwenda kinyume na Mila, Silka na Tamaduni za Kizanzibari.
Ametoa wito kwa wananchi kukemea vikali vitendo vya uvunjifu wa maadili katika maeneo mbalimbali na kusema kuwa Wizara itakuwa mstari wa mbele kuhakikisha wanasimamia suala la maadili na utamaduni endelevu katika Visiwa vya Zanzibar.
Mapema Makamu wa pili wa Rais wa Zanzibar amepokea maandamano ya washiriki wa Tamasha la utamaduni pamoja na kutembelea mabanda ya wajasiriamali na kujionea bidhaa mbali mbali zinazofanywa na wajasiriamali hao.
Imetolewa na Kitengo cha Habari ( OMPR )
Leo tarehe …19 / 09 / 2026
.jpg)
.JPG)
.JPG)
0 Comments