Wakufunzi Watakiwa Kutoa Elimu ya Tahadhari Dhidi ya Mvua za El Nino

Na.Kadija Khamis 

Afisa TEHAMA kutoka Kamisheni ya Kukabiliana na Maafa Zanzibar, Yussuf Said Yussuf, amesema mafunzo ya wakufunzi wa uhamasishaji wa jamii yatawasaidia kutoa elimu na kuwakumbusha wadau pamoja na jamii kuhusu tahadhari na athari zinazoweza kujitokeza kutokana na mvua za msimu wa vuli zinazoambatana na El Nino.

Alisema hayo wakati akifunga mafunzo ya wakufunzi wa uhamasishaji wa jamii kuhusu tahadhari dhidi ya mvua za El Nino, yaliyofanyika katika ukumbi wa Kamisheni ya Kukabiliana na Maafa, Maruhubi, Zanzibar.

Alisema mafunzo hayo yamelenga kuwajengea uwezo wakufunzi katika  kuelewa athari zinazoweza kujitokeza kutokana na mvua hizo, ili waweze kutoa elimu na tahadhari kwa jamii katika ngazi mbalimbali. Ili kuweza kujikinga na kupunguza madhara yanayoweza kusababishwa na maafa.

Aidha, Yussuf alitoa shukrani kwa Shirika la Chakula Duniani (WFP) kwa kuendelea kuiunga mkono Kamisheni ya Kukabiliana na Maafa katika  mashirikiano ya pamoja ya kuhakikisha suala zima  la utoaji wa Elimu ya tahadhari  Kwa Jamii linafanikiwa ipasavyo .

Amesema ushirikiano huo utasaidia kuongeza uelewa na uwezo wa jamii katika kukabiliana na changamoto zinazoweza kujitokeza wakati wa msimu huu wa mvua za vuli, pamoja na kuwezesha wananchi kuchukua hatua mapema ili kupunguza athari za maafa.

Naye Mratibu wa Usimamizi wa Hatari za Tabianchi na Hatua za Mapema za Kukabiliana na Majanga kutoka Shirika la Chakula Duniani (WFP), Sandra Hakim, amesema shirika hilo litaendelea kushirikiana na Serikali ya Mapinduzi ya Zanzibar katika kuimarisha maandalizi na mwitikio wa kukabiliana na majanga, hususan katika kipindi cha mvua za msimu wa vuli.

Amesema WFP itaendelea kushirikiana na Kamisheni ya Kukabiliana na Maafa kuhakikisha maandalizi ya kukabiliana na majanga yanaandaliwa ipasavyo, ikiwemo mipango ya pamoja ya uratibu, utoaji wa elimu kwa jamii na kuchukua hatua stahiki mapema.

Kwa upande wake, Sajenti Shaha Vuai Hanii kutoka Kikosi cha Zimamoto na Uokozi Zanzibar, ameitaka jamii kutoa taarifa mapema kwa Kikosi cha Zimamoto na Uokozi pale inapotokea ajali au tukio linalohitaji huduma za uokozi.

Amesema iwapo wananchi watalazimika kutoa msaada wa awali kabla ya kufika kwa waokoaji, wanapaswa kuchukua tahadhari kwa kuzingatia kina cha maji pamoja na uwezo wao wa kutoa huduma hiyo, ili kuepusha madhara zaidi.

Aidha, amewashauri wananchi kutumia vifaa salama vinavyopatikana katika mazingira yao, ikiwemo kamba, madumu au kuunganisha chupa za plastiki, ili kumsaidia mhanga bila kujiweka katika hatari ya kuathirika wao wenyewe.

Alifahamisha kwamba  Kikosi cha Zimamoto na Uokozi kimetembelea maeneo mbalimbali yanayoweza kuwa hatarishi katika kipindi hiki cha mvua za vuli zinazoambatana na El Nino, yakiwemo Ziwa Maboga, Kwerekwe Sokoni, Kwamtumwa Jeni, Sembeleni, Bwawa la Kinyasini Bwawa la Kazole, na maeneo mengine ambayo ni hatarishi kwa lengo la kutathmini hali ya maeneo hayo na kutoa tahadhari kwa jamii.

Alisema Serikali inaendelea na utaratibu wa kuchukua hatua za kuimarisha usalama katika maeneo hatarishi, ikiwa ni pamoja na kuweka uzio katika baadhi ya maeneo ya mabwawa na mito ili kuzuia wananchi kufika katika maeneo hayo na kujiweka katika hatari.

Aidha, alisema Serikali imeandaa vifaa kwa ajili ya shughuli za uokozi ili kuhakikisha msaada unatolewa kwa wakati pale inapojitokeza dharura.

Sajenti Shaha aliwataka wananchi kutumia namba 114 kuomba msaada pindi linapotokea tukio la dharura, ikiwemo mtu kuzama, ili kuwezesha Kikosi cha Zimamoto na Uokozi kufika kwa wakati na kutoa huduma ya uokozi.

Pia aliwataka wazazi na walezi kuwazuwia  watoto wao kwenda kucheza katika maeneo hatarishi kama vile mabwawa, mito bidimbwi  na maeneo ya bahari wakati wa mvua hizo.

 Afisa Maafa Wilaya ya Kati, Ali Haji Khamis, alitoa elimu kuhusu namna ya kutoa huduma ya kwanza kwa majeruhi kabla ya kufikishwa katika kituo cha afya.

Alisema ni muhimu wananchi kuwa na uelewa wa namna ya kumsaidia mtu aliyezirai au kuzimia, pamoja na kutoa huduma za awali kwa majeruhi wakati wakisubiri msaada wa kitabibu.

Alieleza pia umuhimu wa kutoa msaada wa kisaikolojia kwa majeruhi, hasa katika mazingira ya majanga ambapo mtu anaweza kuwa katika hali ya hofu,taharuki , mshtuko au msongo wa mawazo.

Aidha, aliwataka wakufunzi hao kuwa na uelewa wa kutambua hali ya mgonjwa, ikiwemo mtu ambaye hana fahamu au  hapumui, na kujua hatua za haraka zinazopaswa kuchukuliwa ili kuokoa maisha kabla ya msaada wa kitaalamu kufika.

Alisisitiza umuhimu wa wananchi kujua namna ya kuomba huduma ya ambulance na kutoa taarifa sahihi kuhusu hali ya majeruhi ili kuwezesha msaada wa dharura kutolewa kwa wakati.

Mafunzo hayo ya siku mbili ya wakufunzi wa uhamasishaji Jamii yametolewa na Kamisheni ya kukabiliana na maafa Kwa kushirikiana na Shirika la Chakula Duniani (WFP)