Wajumbe wa Kamati za Kukabiliana na Maafa za Shehia Kujiandaa Mapema kwa Kuhakikisha Mazingira Yanakuwa Safi

Mkuu wa Divisheni ya Operesheni na Huduma za Kibinadamu kutoka Kamisheni ya Kukabiliana na Maafa Zanzibar, Jabu Sharif Haji akitoa elimu kuhusiana na kuchukua hatua za  tahadhari za mapema juu ya msimu wa mvua za vuli  kwa Wajumbe wa  Kamati za Kukabiliana na Maafa za Shehia ya Kianga na Dole huko kwa Sheha wa Kianga,  Wilaya ya Magharibi ‘A’ Unguja.

Mkuu wa Divisheni ya Operesheni na Huduma za Kibinadamu kutoka Kamisheni ya Kukabiliana na Maafa Zanzibar, Jabu Sharif Haji, amewataka Wajumbe wa Kamati za Kukabiliana na Maafa za Shehia kujiandaa mapema kwa kuhakikisha mazingira yanakuwa safi na mifumo ya upitishaji maji inakuwa katika hali nzuri, ili kupunguza athari zinazoweza kujitokeza kutokana na mvua za msimu wa vuli zinazotarajiwa kunyesha kwa kiwango kikubwa.

 

Aliyasema hayo wakati akitoa mafunzo kwa Wajumbe wa  Kamati za Kukabiliana na Maafa za Shehia za Kianga na Dole,huko kwa Sheha wa Kianga,  Wilaya ya Magharibi ‘A’.

 

Alisema ni muhimu kuchukua tahadhari mapema ili jamii iweze kujipanga na kujinusuru dhidi ya madhara yanayoweza kujitokeza kutokana na mvua hizo.

 

Aidha alisema tahadhari haipaswi kusubiri hadi mvua zianze kunyesha, bali wananchi wanapaswa kuanza maandalizi mapema kwa kusafisha mazingira, kuzoa taka  pamoja na kuzibua mitaro ili kuwezesha maji ya mvua kupita kwa urahisi jambo ambalo litasaidia  kupunguza uwezekano wa kutokea kwa mafuriko.

 

Alifahamisha kwamba utabiri wa Mamlaka ya Hali ya Hewa Tanzania (TMA) umetoa taarifa za ongezeko la joto katika bahari ambalo litasababisha mwelekeo ya mvua za msimu wa vuli zikaambatana na hali ya El Nino hivyo ni vyema jamii kutopuuza utabiri huo, kwani huenda utabiri huo ukatimia au usitimie, kwani maandalizi ya mapema yanaweza kuokoa maisha na kupunguza madhara.

 

Aidha, alizitaka kamati hizo kuitisha vikao vya dharura na kuandaa mipango mikakati  ya kukabiliana na maafa, ikiwemo kutambua maeneo hatarishi, kusafisha njia za maji ya mvua pamoja na kuondoa miti mikubwa katika makaazi ya watu ili kunusuru maisha ya watu na mali zao .

 

Akitoa wito kwa wananchi wanaoishi mabondeni na katika njia za asili za maji ya mvua  kuondoka kwa muda katika maeneo hayo ili kuepusha madhara yanayoweza kujitokeza  hivyo ni vyema kuchukua hatua mapema kuliko kusubiri maafa yatokezee.

 

“ Maisha ya binadamu hayawezi kurejeshwa pindi yanapopotea, tofauti na mali ambazo zinaweza kuchumwa tena.” alisema Mkuu huyo .

 

Nae Mkuu wa Divisheni ya Mipango kutoka Kamisheni ya Kukabiliana na Maafa, Maua Sleiman Said, aliwataka wazazi na walezi kushirikiana katika kuwasimamia watoto wao katika kipindi chote cha mvua za vuli ili kuwaepusha na majanga yanayoweza kutokea katika mito, mabwawa, makorongo na maeneo mengine yanayotuwama maji  wakati wa mvua.

 

Aidha alisisitiza kwa wananchi wanaofanya shughuli za uvuvi kusikiliza na kufuatilia utabiri wa hali ya hewa, pamoja na kuhakikisha wanatumia vifaa vya usalama, ikiwemo jaketi za kujiokoa (life jacket).

 

Kwa upande wa wakulima, aliwataka kuvuna mazao ambayo tayari yamekomaa na kuyahifadhi katika maeneo salama na kuweka mbegu katika hali ya usalama  zisipate unyevunyevu sambamba na  wafugaji kuhifadhi mifugo yao katika maeneo salama wakati wa mvua hizo. 

 

Pia alihimiza  kuweka vifaa muhimu katika sehemu salama na kuhakikisha dawa pamoja na mahitaji mengine muhimu vinapatikana kwa wakati.

 

Kwa upande wake,Afisa wa Afya kutoka Wizara ya Afya, Kitengo cha Maradhi ya Mripuko  Mustafa Yahya alisema mabadiliko ya hali ya hewa yasiyo ya kawaida, ikiwemo ongezeko la joto na mvua nyingi, yanaweza kuongeza uwezekano wa kutokea kwa baadhi ya mlipuko wa maradhi .

 

Alisema miongoni mwa magonjwa yanayoweza kujitokeza ni kipindupindu, malaria, kitungunya, tauni, denguo,  magonjwa ya tumbo, homa, macho na mingineyo yanayotokana na mabadiliko ya hali ya hewa na mazingira .  

 

Alieleza kuwa wakati wa mvua nyingi, maji machafu yanaweza kuchanganyika na maji ya visima au vyanzo vingine vya maji safi na salama hasa katika maeneo ambayo vyoo,  na vyanzo vya maji viko karibu hivyo aliiasa jamii kutibu maji kwa waterguard au kuchemsha kabla ya kunywa katika kipindi chote cha mvua za msimu wa vuli  .

 

alisema kipindupindu kinaweza kuenea pale watu wanapotumia maji au chakula kilichochafuliwa na kinyesi, hivyo wananchi wanapaswa kuzingatia usafi wa mazingira, matumizi ya maji salama na kunawa mikono kwa usahihi.

 

Alitoa wito kwa wananchi kuhakikisha vyoo vinakuwa katika hali salama, kutotupa vinyesi katika maeneo ya wazi na kutunza vyanzo vya maji ili kuzuia uchafuzi wakati wa mvua.

 

Hata hivyo alieleza kwamba maandalizi ya kukabiliana na maafa si jukumu la Serikali pekee, bali yanahitaji ushirikiano wa pamoja na wananchi, viongozi wa shehia na wadau mbalimbali.

 

Alisisitiza kuwa wananchi wana nafasi kubwa katika kujiandaa na kuchukua hatua za kinga ili kupunguza madhara yanayoweza kusababishwa na mvua na mabadiliko ya hali ya hewa

Baadhi ya Wajumbe wa Kamati za Kukabiliana na Maafa za Shehia za Kianga na Dole wakimsikiliza  Mkuu wa Divisheni ya Operesheni na Huduma za Kibinadamu kutoka Kamisheni ya Kukabiliana na Maafa Zanzibar, Jabu Sharif Haji (hayupo pichani)  huko kwa Sheha wa Kianga  Wilaya ya Magharibi ‘A’ Unguja.

Afisa afya kutoka Kitengo cha Maradhi ya Mlipuko, akitoa mafunzo ya afya katika kipindi cha msimu wa mvua kwa Wajumbe wa  Kamati za Kukabiliana na Maafa za Shehia ya Kianga na Dole huko kwa Sheha wa Kianga,  Wilaya ya Magharibi ‘A’Unguja.

Baadhi ya Wajumbe wa Kamati za Kukabiliana na Maafa za Shehia za Kianga na Dole wakimsikiliza  Mkuu wa Divisheni ya Operesheni na Huduma za Kibinadamu kutoka Kamisheni ya Kukabiliana na Maafa Zanzibar, Jabu Sharif Haji (hayupo pichani)  huko kwa Sheha wa Kianga  Wilaya ya Magharibi ‘A’ Unguja.