Kikao cha kuratibu shughuli za Hija Nchini Tanzania

Makamu wa Pili wa Rais wa Zanzibar Alhajj Hemed Suleiman Abdulla ameongoza kikao cha Kuratib Shughuli za Hija Nchini Tanzania kilichowakutanisha Viongozi wa Serikali, Viongozi wa Dini na Taasisi zinazosafirisha Mahujaji kutoka Tanzania Bara na Zanzibar, kilichofanyika katika ukumbi wa Tume ya Uchaguzi Zanzibar.

Imetolewa na Kitengo cha Habari (OMPR)

tarehe 12 Oktoba 2026.

Taasisi za Hijja Nchini zimetakiwa kuhakikisha gharama wanazowatozwa Mahujaji ziwe zinaendana na Huduma zinazotolewa na Taasisi hizo ili kuwawekea mazingira mazuri na wezeshi katika kutekeleza Ibada ya Hija.

Makamu wa Pili wa Rais wa Zanzibar Alhajj Hemed Suleiman Abdulla ameyasema hayo katika Kikao cha kuratibu shughuli za Hija Nchini Tanzania kilichofanyika Ukumbi wa Tume ya Uchaguzi Maisara Jijini Zanzibar.

Amesema kumekuwa na Malalamiko mengi kutoka kwa mahujaji wanaorudi kutekeleza Ibada ya Hijja kwamba huduma wanazopatiwa  haziendani na gharama wanazotoa ikiwemo Hotel, chakula na usafiri wa ndani Makka na Madina.

Alhajj Hemed ameeleza kuwa wakati umefika kwa BIITHA ya Hijja Tanzania kuzifanyia tathmini Taasisi zote zinazosafirisha Mahujaji ili ziweze kutekeleza majukumu yao kwa uwazi na viwango vinavyotakiwa.

Alhajj Hememd ameiagiza Ofisi ya Hija Tanzania kukaa pamoja na mashirika ya Ndege kuona namna Bora ya kapunguza gharama za Usafiri jambo litakalosaidia  kupungua kwa gharama za Ibada ya Hijja na kuongezeka kwa idadi ya mahujaji.

Sambamba na hayo ameishauri Wizara ya Hija Nchini Saudiarabia kuhakikisha wanatoa taarifa mapema kwa makampuni yanayosafirisha mahujaji endapo kutakuwa na mabadiliko yoyote kinyume na  utaratibu uliozoeleka  ili kutoa nafasi kwa makampuni hayo kukabiliana na mabadiliko yaliyojitokeza kwa lengo la kutoa  huduma Bora kwa Watanzania.

Nae Waziri wa Nchi Ofisi ya Rais, Katiba Sheria, Utumishi na Utawala Bora Mhe. Alhajj Dkt. Mwalim Haroun Ali Suleiman ameziomba Taasisi za Hijja kujitahidi katika kutoa huduma Bora kwa Mahujaji na kuwajengea mazingira bora katika kutekeleza Ibada ya Hijja Nchini Saudi Arabia.

Ameeleza kuwa Wizara yake imepanga kukutana na Baraza Kuu la Waislamu Tanzania (BAKWATA) ili kujadili Masuala mbali mbali ya Hijja ikiwemo changamoto zinazojitokeza kila mwaka na namna ya kuzipatia ufumbuzi ili Mahujaji waweze kufanya ibada ya Hija kwa ufanisi mkubwa.

Kwa upande wake Mkurugenzi wa Huduma za Hijja BAKWATA Alhajj Sheikh Haidar Muhamed Said  ameipongeza Serikali ya Jamhuri ya Muungano wa Tanzania na Serikali ya Mapinduzi ya Zanzibar kwa utayari walionao katika kusimamia suala la Hijja hatua inayowapa Imani Watanzania katika kutekeleza Ibada zao.

Kikao cha kuratibu shughuli za hijja nchini Tanzania  kimewakutanisha wajumbe kutoka Wizara mbali mbali za Serikali ya Jamhuri ya Muungano wa Tanzania, Serikali ya Mapinduzi ya Zanzibar, Kamisheni ya Wakfu na Mali ya Amana, Baraza Kuu la Waislamu Tanzania (BAKWATA), Ofisi ya Mufti Mkuu wa Zanzibar pamoja na Viongozi wa Taasisi zinazosafirisha Mahujaji Nchini Tanzania

Imetolewa na kitengo cha Habari ( OMPR )

Leo tarehe …12 / 10 / 2026