Uwepo wa Miundo ya Utumishi ni Muhimu Kuhakikisha Watumishi Wanapangwa na Kupewa Majukumu kwa Kuzingatia Kada na Nafasi Zao

Na.Mwandishi wa Wizara ya Afya Zanzibar.

KAMISHENI ya Utumishi wa Umma Zanzibar imekabidhi miundo ya Utumishi kwa Wakala wa Bohari Kuu ya Dawa Baraza la Taifa la Watu Wenye Ulemavu Zanzibar pamoja na ikiwa na lengo la kuwezesha taasisi hizo kutekeleza majukumu yao kwa ufanisi na kutoa huduma bora kwa wananchi.

Akizungumza wakati wa makabidhiano hayo, Katibu wa Kamisheni ya Utumishi wa Umma Zanzibar, Ndg.Kubingwa Mashaka Simba,amesema uwepo wa miundo ya Utumishi ni muhimu katika kuhakikisha watumishi wanapangwa na kupewa majukumu kwa kuzingatia kada na nafasi zao, ili kila mtumishi aweze kutekeleza wajibu wake kwa ufanisi.

Amesema miundo hiyo imeainisha kada, nafasi na majukumu ya watumishi katika taasisi hizo, jambo ambalo litasaidia kuweka uwiano mzuri wa kiutumishi na kuhakikisha kila mfanyakazi anafahamu nafasi yake na wajibu unaomkabili katika utekelezaji wa majukumu.

 Amefahamisha kuwa endapo miundo hiyo haitatumika ipasavyo na kutekelezwa kwa mujibu wa taratibu zilizowekwa, malengo yaliyokusudiwa hayawezi kufikiwa hivyo, amezitaka taasisi hizo kuhakikisha miundo hiyo inatumika kama ilivyokusudiwa ili kuongeza ufanisi na kuboresha utoaji wa huduma kwa wananchi.

Aidha, amewataka viongozi na watendaji wa taasisi hizo kuzingatia utekelezaji wa miundo hiyo kwa kuwapatia watumishi majukumu yanayolingana na kada na nafasi zao, pamoja na kuhakikisha masuala ya mishahara na maslahi ya watumishi yanaendana na nafasi walizopangiwa.

 Amesisitiza kuwa miundo ya Utumishi si jambo la siri, bali ni nyenzo muhimu ambayo kila mtumishi anatakiwa kuifahamu ili aweze kuelewa nafasi yake, majukumu yake na namna ya kuyatekeleza huku akisema kuwa  matumizi sahihi ya miundo hiyo yataendelea kusaidia taasisi hizo kuwa na mfumo mzuri wa utendaji kazi na hatimaye kufikia lengo la Serikali la kutoa huduma bora na zenye ufanisi kwa wananchi.

Kwa upande wake Mkurugenzi Mkuu Wakala wa Bohari Kuu ya Dawa Abdalla Mohamed Abdalla amesema kupokea muundo huo wa Utumishi ni hatua muhimu itakayosaidia Wakala kuimarisha utekelezaji wa majukumu yake na kuongeza ufanisi katika utoaji wa huduma kwa wananchi.

Amesema muundo huo utasaidia kuweka wazi majukumu na nafasi za watumishi katika maeneo yao ya kazi, jambo litakalowezesha Wakala kufanya kazi kwa ufanisi zaidi na kuhakikisha wananchi wanapata dawa na vifaa tiba kwa wakati na kwa kiwango kinachohitajika.

Nae Katibu Mtendaji wa Baraza la Taifa la watu wenye ulemavu Zanzibar Ussy Khamis Debe amesema kupokea muundo huo wa Utumishi ni hatua muhimu katika kuimarisha utendaji wa Baraza na kuhakikisha kila mtumishi anatekeleza majukumu yake kwa mujibu wa nafasi na kada aliyopewa.

Amesema Baraza litahakikisha linashirikiana na watumishi wake, kwa kuzingatia mahitaji yao, haki zao za msingi na fursa sawa za kutekeleza majukumu yao katika mazingira rafiki na jumuishi ya kazi na  utekelezaji wa muundo huo utasaidia kuweka utaratibu mzuri wa kiutumishi, kuongeza ufanisi na kuhakikisha Baraza linafikia malengo yake ya kulinda, kutetea na kuendeleza haki na fursa za watu wenye ulemavu Zanzibar.

Mwisho.