Shirika la Specsavers imetoa huduma za uchunguzi na upimaji wa afya ya macho pamoja na ugawaji wa miwani bure

Na.Mwandishi Wizara ya Afya Zanzibar.    

WIZARA ya Afya Zanzibar kwa kushirikiana na Shirika la Specsavers imetoa huduma za uchunguzi na upimaji wa afya ya macho pamoja na ugawaji wa miwani bure kwa wananchi katika Kituo cha Afya Makunduchi, Wilaya ya Kusini Unguja.

Huduma hizo zimetolewa kwa lengo la kuwasaidia wananchi kutambua mapema matatizo mbalimbali ya macho, kupata ushauri wa kitaalamu na kupatiwa huduma kulingana na mahitaji yao.

Akizungumza wakati wa zoezi hilo, Mratibu wa Huduma za Afya ya Macho Zanzibar, Dkt Fatma Juma Omar, amesema zoezi hilo linafanyika kwa muda wa siku nne, ambapo wananchi wanapatiwa uchunguzi wa afya ya macho pamoja na upimaji wa uwezo wa kuona.

Amesema wananchi watakaobainika kuwa na matatizo ya macho watapatiwa ushauri wa kitaalamu na dawa kulingana na aina ya tatizo, huku wale watakaobainika kuwa na changamoto zinazohitaji upasuaji watafanyiwa uchunguzi zaidi na kupewa matibabu yanayostahili.

Amefahamisha kuwa zoezi hilo linalenga kuwafikia wananchi wapatao 1,500, hivyo amewahimiza wananchi kutumia fursa hiyo na nyingine zinazotolewa na Wizara ya Afya kwa kushirikiana na wadau katika kulinda afya ya macho na kugundua matatizo mapema.

Ameeleza kuwa katika zoezi hilo wananchi wanapatiwa miwani ya aina mbalimbali kulingana na mahitaji yao, ikiwemo miwani ya kusomea, miwani ya kusaidia kuona vitu vilivyo mbali pamoja na miwani ya kukinga macho dhidi ya mwanga wa jua.

Aidha, amewataka wananchi wa Makunduchi, Paje, Jambiani, Kitogani na maeneo ya jirani kujitokeza kupata huduma hizo, huku akisisitiza kuwa wananchi kutoka maeneo mengine ya Zanzibar wanapaswa kutumia fursa za huduma za afya ya macho zinapotolewa katika maeneo yao.

Kwa upande wake, Mkurugenzi Mtendaji  wa Shirika la Specsavers nchini Sweden Marita Bertilson amesema shirika hilo litaendelea kushirikiana na Wizara ya Afya Zanzibar katika kuimarisha huduma za afya ya macho, ikiwemo uchunguzi, upimaji wa macho na utoaji wa miwani kwa wananchi wenye uhitaji.

Amesema ushirikiano huo ni sehemu ya juhudi za Specsavers za kusaidia jamii mbalimbali duniani katika kuboresha afya ya macho, na kwamba kwa kushirikiana na Wizara ya Afya Zanzibar wataweza kuwafikia wananchi wengi zaidi na kuwasaidia kupata huduma kwa wakati.

Kwa upande wao, wananchi waliopatiwa huduma hizo wameishukuru Wizara ya Afya Zanzibar na Shirika la Specsavers kwa kuwafikishia huduma hizo katika maeneo yao, wakisema zoezi hilo limewasaidia kufahamu hali ya afya ya macho yao na kupata miwani bure kulingana na mahitaji yao.

Wamesema baadhi yao walikuwa wakikabiliwa na changamoto za kuona wakati wa kusoma, kufanya shughuli za kila siku na kuona vitu vilivyo mbali, lakini wamepata fursa ya kufanyiwa uchunguzi, kupata ushauri wa kitaalamu na kupatiwa miwani inayowasaidia.

Wananchi hao wamewahimiza wananchi wengine kujitokeza pindi huduma kama hizo zinapotolewa, wakisema uchunguzi wa macho ni muhimu kwa kila mtu kwa sababu unasaidia kugundua matatizo mapema na kupata huduma stahiki kwa wakati.

Zoezi hilo ni sehemu ya juhudi za Wizara ya Afya Zanzibar kwa kushirikiana na wadau wake katika kuimarisha huduma za afya ya macho na kuhakikisha wananchi wanapata huduma bora, salama na kwa wakati.

 Mwisho.