mkutano huo umelenga kupitia matokeo ya uchunguzi uliofanyika kuhusu changamoto za utoaji wa huduma za afya

WIZARA ya Afya Zanzibar kupitia Baraza la Madaktari, imekutana na madaktari kutoka hospitali za Serikali, hospitali binafsi na hospitali za vikosi vya ulinzi na usalama, kujadili changamoto zinazojitokeza katika utoaji wa huduma za afya, hususan mfumo wa rufaa za wagonjwa, uzingatiaji wa maadili ya taaluma ya udaktari na namna ya kuimarisha usalama wa wagonjwa.

Akizungumza katika mkutano huo, Kaimu Mwenyekiti wa Baraza la Madaktari Zanzibar, Dkt. Otta Limo, amesema mkutano huo umelenga kupitia matokeo ya uchunguzi uliofanyika kuhusu changamoto za utoaji wa huduma za afya na kujadili hatua za kuchukuliwa ili kuboresha huduma hizo na kuhakikisha wananchi wanapata matibabu bora na salama.

Amesema mkutano huo umewakutanisha wadau mbalimbali wa sekta ya afya, wakiwemo wawakilishi wa Wizara ya Afya, vituo vya kutolea huduma za afya na sekta ya bima, kwa lengo la kubadilishana uzoefu, kubaini changamoto zilizopo na kuweka mikakati ya pamoja ya kuimarisha utoaji wa huduma za afya Zanzibar.

 Amefahamisha kuwa  Baraza limekuwa likipokea kesi na malalamiko mbalimbali yanayohusiana na utoaji wa huduma za afya, ambapo baadhi ya matukio yamesababisha madhara kwa wagonjwa na wakati mwingine kupoteza maisha. Kutokana na hali hiyo, amewataka madaktari kuzingatia maadili ya taaluma yao, kufuata miongozo ya matibabu na kutekeleza majukumu yao kwa weledi na uangalifu ili kupunguza makosa yanayoweza kuepukika.

Akizungumzia mfumo wa rufaa za wagonjwa, amesema suala hilo ni miongoni mwa maeneo muhimu yaliyojadiliwa katika mkutano huo, kutokana na umuhimu wake katika kuhakikisha wagonjwa wanaohitaji huduma za kibingwa wanapata matibabu katika vituo vinavyostahili kwa wakati.

Amesema madaktari kutoka hospitali mbalimbali, wakiwemo wa Hospitali ya Rufaa ya Lumumba, wamejadili changamoto zinazojitokeza katika mfumo huo na namna ya kuimarisha mawasiliano na uratibu baina ya hospitali zinazowapeleka wagonjwa na zile zinazowapokea.

Ameeleza kuwa mfumo mzuri wa rufaa unahitaji taarifa sahihi za mgonjwa, mawasiliano ya karibu baina ya wataalamu wa afya na maandalizi yanayofaa kabla ya mgonjwa kuhamishiwa katika kituo kingine. Hatua hizo zitasaidia kupunguza ucheleweshaji wa matibabu na kuhakikisha wagonjwa wanapata huduma zinazolingana na mahitaji yao.

Aidha, mkutano huo umetumika kutambulisha Chama cha Madaktari wa Tiba na Meno Zanzibar, hatua inayolenga kuimarisha ushirikiano miongoni mwa wataalamu wa afya na kukuza maendeleo ya taaluma za udaktari na tiba ya meno. Ushirikiano huo pia utatoa nafasi kwa wataalamu kujadili masuala ya kitaaluma na kutafuta njia za pamoja za kukabiliana na changamoto zinazojitokeza katika utoaji wa huduma za afya.

Kwa upande wake, Daktari Bingwa wa Magonjwa ya Ndani na Mwenyekiti wa Timu ya Ukaguzi wa Huduma za Afya, Dkt. Ibrahim Ali Ibrahim, amesema mkutano huo umetumika kutoa elimu kwa madaktari wa ngazi mbalimbali, wakiwemo madaktari bingwa na wanaosimamia hospitali, kuhusu umuhimu wa kuzingatia misingi bora ya taaluma ya udaktari na kuboresha huduma wanazozitoa kwa wagonjwa.

Amesema miongoni mwa maeneo yaliyopewa kipaumbele ni uandishi sahihi wa taarifa za wagonjwa na utunzaji wa kumbukumbu katika mifumo ya hospitali, akieleza kuwa kumbukumbu hizo husaidia kufuatilia historia ya mgonjwa, kutathmini maendeleo yake wakati wa matibabu na kuwawezesha madaktari kufanya maamuzi sahihi ya kitabibu.

Ameongeza kuwa ukaguzi wa huduma za afya ni muhimu katika kubaini mapungufu, kufuatilia utekelezaji wa miongozo na kuwasaidia wataalamu kujifunza kutokana na changamoto zinazojitokeza, hatua inayochangia kuimarisha uwajibikaji na kuongeza ubora wa huduma zinazotolewa kwa wananchi.

Katika hatua nyingine, Baraza la Madaktari Zanzibar limetoa vyeti vya pongezi kwa madaktari bingwa, madaktari wasaidizi wa tiba na madaktari wasaidizi wa tiba ya meno waliofanikisha kufanya upya leseni zao za kitaaluma kwa kiwango cha asilimia 95.

Utoaji wa vyeti hivyo ni sehemu ya kutambua juhudi za wataalamu hao katika kuzingatia taratibu za usajili na leseni za kitaaluma, huku ukiwahamasisha wengine kuhakikisha leseni zao zinafanywa upya kwa wakati kwa mujibu wa taratibu zilizowekwa.

Juhudi hizo zinaendelea kuunga mkono azma ya Wizara ya Afya Zanzibar ya kuimarisha usimamizi wa taaluma za afya, kuongeza uwajibikaji wa wataalamu na kuhakikisha wananchi wanapata huduma za matibabu zilizo bora, salama na zinazozingatia maadili ya kitaaluma.

Mwisho